ರೈತರಿಗೆ ಗುಡ್‌ನ್ಯೂಸ್: ನೇಗಿಲಯೋಗಿ ಯೋಜನೆ ಜಾರಿಗೆ! ಜಮೀನು ಉಳುಮೆ ಮಾಡಲು ಸಹಾಯಧನ – ಬೇಗ ಅರ್ಜಿ ಸಲ್ಲಿಸಿ

ಮೂರು ಎಕರೆಗಿಂತ ಕಡಿಮೆ ಜಮೀನಿರುವ ರೈತರಿಗೆ ಉಚಿತ ಉಳುಮೆ: ಮುಖ್ಯಮಂತ್ರಿ ನೇಗಿಲಯೋಗಿ ಯೋಜನೆಗೆ ಸಂಪುಟ ಒಪ್ಪಿಗೆ

ಬೆಂಗಳೂರು: ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಸರ್ಕಾರ ನೂರು ದಿನ ಪೂರೈಸುವ ಹಿನ್ನೆಲೆಯಲ್ಲಿ ರೈತರು, ನಿರ್ವಸತಿ ಕುಟುಂಬಗಳು ಮತ್ತು ಕೈಗಾರಿಕಾ ಕಾರ್ಮಿಕರಿಗೆ ನೇರವಾಗಿ ತಲುಪುವ ಹಲವು ಯೋಜನೆಗಳಿಗೆ ಬುಧವಾರ ವಿಧಾನಸೌಧದಲ್ಲಿ ನಡೆದ ಸಚಿವ ಸಂಪುಟ ಸಭೆ ಅಂಗೀಕಾರ ನೀಡಿದೆ.

ಇವುಗಳಲ್ಲಿ ಅತ್ಯಂತ ಗಮನ ಸೆಳೆದಿರುವುದು ಮೂರು ಎಕರೆಗಿಂತ ಕಡಿಮೆ ಕೃಷಿ ಭೂಮಿ ಹೊಂದಿರುವ ಸಣ್ಣ ಹಾಗೂ ಅತಿ ಸಣ್ಣ ರೈತರಿಗೆ ಸರ್ಕಾರವೇ ಟ್ರ್ಯಾಕ್ಟರ್ ಬಾಡಿಗೆ ಪಡೆದು ಉಚಿತವಾಗಿ ಉಳುಮೆ ಮಾಡಿಸುವ ಮುಖ್ಯಮಂತ್ರಿ ನೇಗಿಲಯೋಗಿ ಯೋಜನೆ.

ಉಪಮುಖ್ಯಮಂತ್ರಿ ಜಿ. ಪರಮೇಶ್ವರ್ ಅವರು ಸಭೆಯ ನಂತರ ನಡೆಸಿದ ಪತ್ರಿಕಾಗೋಷ್ಠಿಯಲ್ಲಿ ಈ ನಿರ್ಧಾರಗಳನ್ನು ವಿವರಿಸಿದರು.

 

ಸಣ್ಣ ರೈತರ ಬಹುತೇಕರ ಬಳಿ ಎತ್ತು, ಎಮ್ಮೆ ಅಥವಾ ಸ್ವಂತ ಟ್ರ್ಯಾಕ್ಟರ್ ಇಲ್ಲದೆ ಜಮೀನು ಬೀಳು ಬಿದ್ದು ಹೋಗುವ ಸನ್ನಿವೇಶ ರಾಜ್ಯದ ಹಲವು ಗ್ರಾಮಗಳಲ್ಲಿ ಕಾಣಸಿಗುತ್ತದೆ. ಇದನ್ನೇ ಗಮನದಲ್ಲಿಟ್ಟುಕೊಂಡು ಸರ್ಕಾರ ಈ ಯೋಜನೆಯನ್ನು ತಂದಿದೆ.

 

ನೇಗಿಲಯೋಗಿ ಯೋಜನೆ ಹೇಗೆ ಕೆಲಸ ಮಾಡುತ್ತದೆ.?

ಯೋಜನೆಯಡಿ ಮೂರು ಎಕರೆ ಅಥವಾ ಅದಕ್ಕಿಂತ ಕಡಿಮೆ ಜಮೀನು ಹೊಂದಿರುವ ರೈತರ ಭೂಮಿಯಲ್ಲಿ ಉಳುಮೆ ಸಂಪೂರ್ಣವಾಗಿ ಉಚಿತ. ಸರ್ಕಾರ ಗ್ರಾಮದಲ್ಲಿರುವ ಟ್ರ್ಯಾಕ್ಟರ್ ಮಾಲೀಕರಿಂದ ಯಂತ್ರಗಳನ್ನು ಬಾಡಿಗೆಗೆ ಪಡೆದು ಬಾಡಿಗೆ ಹಣವನ್ನು ಸರ್ಕಾರವೇ ಪಾವತಿಸುತ್ತದೆ.

ಒಂದು ಗ್ರಾಮದಲ್ಲಿ ಐದು ಮಂದಿ ಟ್ರ್ಯಾಕ್ಟರ್ ಹೊಂದಿದ್ದು ತಮ್ಮ ಜಮೀನು ಮುಗಿಸಿದ ನಂತರ ಯಂತ್ರ ನಿಷ್ಕ್ರಿಯವಾಗಿ ನಿಂತಿದ್ದರೆ, ಅದನ್ನೇ ಉಳಿದ ರೈತರ ಜಮೀನಿಗೆ ಬಳಸಲಾಗುತ್ತದೆ.

ಗ್ರಾಮದಲ್ಲೇ ಟ್ರ್ಯಾಕ್ಟರ್ ಸಾಕಾಗದಿದ್ದರೆ ಬೇರೆಡೆಯಿಂದ ತರಿಸಲಾಗುತ್ತದೆ. ಅಗತ್ಯ ಬಿದ್ದರೆ ಸರ್ಕಾರವೇ 500 ರಿಂದ 1,000 ಟ್ರ್ಯಾಕ್ಟರ್‌ಗಳನ್ನು ಖರೀದಿಸುವ ಸಾಧ್ಯತೆಯಿದೆ ಎಂದು ಉಪಮುಖ್ಯಮಂತ್ರಿ ತಿಳಿಸಿದರು.

ರಾಜ್ಯದಲ್ಲಿ ಸುಮಾರು 59 ಲಕ್ಷ ರೈತರು ಈ ವರ್ಗದಲ್ಲಿ ಬರುವುದರಿಂದ ಯೋಜನೆ ಯಶಸ್ವಿಯಾದರೆ ಬೀಳು ಭೂಮಿ ಕಡಿಮೆಯಾಗಿ ಕೃಷಿ ಉತ್ಪಾದನೆ ಹೆಚ್ಚುವ ನಿರೀಕ್ಷೆಯಿದೆ.

 

ಪ್ರಾಯೋಗಿಕ ಅನುಷ್ಠಾನ ಮತ್ತು 152 ಕೋಟಿ ಅನುದಾನ.?

ಮೊದಲ ಹಂತದಲ್ಲಿ ಪ್ರತಿ ಜಿಲ್ಲೆಗೆ ಒಂದರಂತೆ 31 ತಾಲೂಕುಗಳಲ್ಲಿ ಪ್ರಾಯೋಗಿಕವಾಗಿ ಆರಂಭಿಸಲಾಗುತ್ತದೆ. ಇದಕ್ಕಾಗಿ 152 ಕೋಟಿ ರೂಪಾಯಿ ಅನುದಾನ ಮೀಸಲಿಡಲಾಗಿದೆ.

ಅನುಷ್ಠಾನದ ಜವಾಬ್ದಾರಿ ಕೃಷಿ ಇಲಾಖೆಯ ಮೇಲಿದೆ. ಪ್ರಾಯೋಗಿಕ ಹಂತ ಯಶಸ್ವಿಯಾದರೆ ಮುಂದಿನ ವರ್ಷದಿಂದ ಉಳಿದ ತಾಲೂಕುಗಳಿಗೆ ವಿಸ್ತರಿಸುವುದಾಗಿ ಸರ್ಕಾರ ಹೇಳಿದೆ.

ಗೌರಿಬಿದನೂರು ಕ್ಷೇತ್ರದ ಪಕ್ಷೇತರ ಶಾಸಕ ಕೆ.ಎಚ್. ಪುಟ್ಟಸ್ವಾಮಿಗೌಡ ಅವರು ಸ್ಥಳೀಯವಾಗಿ ಟ್ರ್ಯಾಕ್ಟರ್ ಖರೀದಿಸಿ ಬಡ ರೈತರ ಜಮೀನು ಉಳುಮೆ ಮಾಡಿಸಿದ ಮಾದರಿಯನ್ನು ಸರ್ಕಾರ ಗಮನಿಸಿ ರಾಜ್ಯಮಟ್ಟದ ಯೋಜನೆ ರೂಪಿಸಿದೆ ಎಂದು ಉಪಮುಖ್ಯಮಂತ್ರಿ ವಿವರಿಸಿದರು.

 

15 ಲಕ್ಷ ನಿವೇಶನ ಮತ್ತು ಶ್ರಮಿಕ್ ನಿವಾಸ.?

ನಿರ್ವಸತಿ ಕುಟುಂಬಗಳಿಗೆ ಪ್ರತಿ ಜಿಲ್ಲೆಗೆ 50 ಸಾವಿರ ನಿವೇಶನದಂತೆ ರಾಜ್ಯದಲ್ಲಿ 15 ಲಕ್ಷ ಸೈಟು ಹಂಚಿಕೆಗೆ ನಿರ್ಧಾರವಾಗಿದೆ. ಈಗಾಗಲೇ ಸುಮಾರು 10 ಸಾವಿರ ಎಕರೆ ಜಾಗವನ್ನು ಜಿಲ್ಲಾಧಿಕಾರಿಗಳು ಗುರುತಿಸಿದ್ದಾರೆ. ನಿವೇಶನ ಅಭಿವೃದ್ಧಿಗೆ ಸರ್ಕಾರವೇ ಹಣ ನೀಡಲಿದೆ.

ಮುಂದಿನ ಎರಡು ತಿಂಗಳಲ್ಲಿ ಮೊದಲ ಹಂತದ 5 ಲಕ್ಷ ನಿವೇಶನ ಹಂಚಿಕೆ ಗುರಿಯಾಗಿದೆ. ಎಸ್ಸಿ, ಎಸ್ಟಿ ಮತ್ತು ಹಿಂದುಳಿದ ವರ್ಗಗಳಿಗೆ ಆದ್ಯತೆ ನೀಡಲಾಗುವುದು. ಎಸ್ಸಿ-ಎಸ್ಟಿ ಕಾಲೋನಿ ಅಭಿವೃದ್ಧಿಗೂ ನಿರ್ಧಾರವಾಗಿದೆ.

ಕೈಗಾರಿಕೆಗಳಲ್ಲಿ ದುಡಿಯುವ ಕಾರ್ಮಿಕರಿಗೆ ಕೆಲಸದ ಸ್ಥಳದ ಸಮೀಪ ಮನೆ ಒದಗಿಸುವ ಶ್ರಮಿಕ್ ನಿವಾಸ ಯೋಜನೆಯಡಿ ದೊಡ್ಡ ಕಂಪನಿಗಳು ಮೊದಲ ಹಂತದಲ್ಲಿ 10 ಸಾವಿರ ಮನೆ ನಿರ್ಮಿಸಬೇಕು. ಕಂಪನಿಗಳಿಗೆ ಸಹಾಯಧನ ಮತ್ತು ಕೆಐಎಡಿಬಿ ಮೂಲಕ ಸಬ್ಸಿಡಿ ಸಹಿತ ಭೂಮಿ ನೀಡಲಾಗುವುದು. ಪ್ರತ್ಯೇಕ ಮಾರ್ಗಸೂಚಿ ಹೊರಡಿಸಲಾಗುವುದು. ವಿವಿಧ ನಿಗಮಗಳ ಮೂಲಕ 10 ಸಾವಿರ ಟ್ಯಾಕ್ಸಿ ಹಂಚಿಕೆಯೂ ನಿರ್ಧಾರವಾಗಿದೆ.

 

ಏರೋಸ್ಪೇಸ್ ನೀತಿ ಮತ್ತು ಹಿಂದುಳಿದ ಜಿಲ್ಲೆಗಳಿಗೆ ಉದ್ಯೋಗ ನಿಧಿ.?

2026-31ರ ಕರ್ನಾಟಕ ಏರೋಸ್ಪೇಸ್ ನೀತಿಗೆ ಸಂಪುಟ ಅನುಮೋದನೆ ನೀಡಿದೆ. ಐದು ವರ್ಷಗಳಲ್ಲಿ 60 ಸಾವಿರ ಕೋಟಿ ರೂಪಾಯಿ ಹೂಡಿಕೆ ಮತ್ತು 60 ಸಾವಿರ ಉದ್ಯೋಗ ಸೃಷ್ಟಿ ಗುರಿ. ವಲಯ-1ಕ್ಕೆ ಶೇ.30, ವಲಯ-2ಕ್ಕೆ ಶೇ.27.5 ಮತ್ತು ವಲಯ-3ಕ್ಕೆ ಶೇ.25 ಬಂಡವಾಳ ಸಬ್ಸಿಡಿ ಇರಲಿದೆ.

ಎಚ್‌ಎಎಲ್‌ನಲ್ಲಿ ಟಾಟಾ 40 ವಿಮಾನ ತಯಾರಿಕೆ ಮತ್ತು 97 ಲೈಟ್ ಕಾಂಬ್ಯಾಟ್ ಹೆಲಿಕಾಪ್ಟರ್ ಉತ್ಪಾದನೆ ಗುರಿಯೊಂದಿಗೆ ಬಿಡಿಭಾಗ ತಯಾರಕರಿಗೂ ನೆರವು ನೀಡಲಾಗುವುದು.

ಪ್ರೊ. ಗೋವಿಂದರಾವ್ ಸಮಿತಿ ಗುರುತಿಸಿದ ಯಾದಗಿರಿ, ಬೀದರ್, ಕಲಬುರಗಿ, ರಾಯಚೂರು, ಬೆಳಗಾವಿ, ಕೊಪ್ಪಳ, ವಿಜಯನಗರ, ಗದಗ, ಹಾವೇರಿ ಮತ್ತು ವಿಜಯಪುರ ಜಿಲ್ಲೆಗಳಲ್ಲಿ ಹೊಸ ಉದ್ಯೋಗ ಸೃಷ್ಟಿಸಿದ ಕಂಪನಿಗೆ ಪ್ರತಿ ಉದ್ಯೋಗಕ್ಕೆ ತಿಂಗಳಿಗೆ 2,500 ರೂಪಾಯಿ ಪ್ರೋತ್ಸಾಹ ಧನವನ್ನು ಎರಡು ವರ್ಷ ನೀಡುವ ಉದ್ಯೋಗ ನಿಧಿ ಯೋಜನೆಗೆ 300 ಕೋಟಿ ಮೀಸಲಿಡಲಾಗಿದೆ.

ಇಪಿಎಫ್ ಪಾವತಿಗೂ ನೆರವು ಇದೆ. ಹಿಂದುಳಿದ ತಾಲೂಕುಗಳಲ್ಲಿ ಶೇ.10 ಮತ್ತು ಅತಿ ಹಿಂದುಳಿದ ತಾಲೂಕುಗಳಲ್ಲಿ ಶೇ.20 ಸಹಾಯಧನ. ಪ್ರತಿ ಜಿಲ್ಲೆಯಿಂದ ಕೇವಲ ಎರಡು ತಾಲೂಕು ಮಾತ್ರ ಆಯ್ಕೆ.

 

ಆರೋಗ್ಯ, ರಸ್ತೆ, ಶಕ್ತಿ ಕಾರ್ಡ್ ಮತ್ತು ಇತರ ನಿರ್ಧಾರಗಳು.?

ನೂತನ ಜವಳಿ ಮತ್ತು ಸಿದ್ಧ ಉಡುಪು ನೀತಿ 2026-31ಕ್ಕೂ ಅನುಮೋದನೆ ಸಿಕ್ಕಿದೆ. ಎರಡನೇ ಮತ್ತು ಮೂರನೇ ಹಂತದ 172 ಸ್ಥಳೀಯ ಪ್ರದೇಶಗಳಲ್ಲಿ ಜಿಐಎಸ್ ಆಧಾರಿತ ರಸ್ತೆ ಜಾಲ ಮತ್ತು ಹೊರವರ್ತುಲ ರಸ್ತೆ ನಿರ್ಮಾಣಕ್ಕೆ ಯೋಜನೆ. ರಿಂಗ್ ರೋಡ್ ಪಕ್ಕ 2 ಕಿ.ಮೀ. ಪ್ರಭಾವ ವಲಯದಲ್ಲಿ ಮನೆ ನಿರ್ಮಾಣ ನಿಷೇಧ.

ಚಿಕ್ಕಬಳ್ಳಾಪುರದಲ್ಲಿ ದೇಶದ ಮೊದಲ ಡ್ರೋನ್ ಪರೀಕ್ಷಾ ಕೇಂದ್ರಕ್ಕೆ 42.83 ಕೋಟಿ, ಬೆಂಗಳೂರಿನ ಐಐಐಟಿಯಲ್ಲಿ ಎಐ ಹಬ್‌ಗೆ 35 ಕೋಟಿ ಮಂಜೂರಾಗಿದೆ. ಮಹಿಳಾ ಪ್ರಯಾಣಿಕರಿಗೆ ಶಕ್ತಿ ಸ್ಮಾರ್ಟ್ ಕಾರ್ಡ್‌ಗೆ 237 ಕೋಟಿ ವೆಚ್ಚದಲ್ಲಿ ಪಿಪಿಪಿ ಮಾದರಿ ಜಾರಿ.

185 ಸರ್ಕಾರಿ ಆರೋಗ್ಯ ಸಂಸ್ಥೆಗಳಲ್ಲಿ ಟೆಲಿ-ಐಸಿಯುಗೆ 10.78 ಕೋಟಿ, 162 ಎಕ್ಸ್-ರೇ ಘಟಕಗಳನ್ನು ಡಿಜಿಟಲ್ ರೇಡಿಯೋಗ್ರಫಿಗೆ ಉನ್ನತೀಕರಿಸಲು 40.50 ಕೋಟಿ, 50 ತಾಲೂಕು ಆಸ್ಪತ್ರೆಗಳಲ್ಲಿ ಕಿವಿ-ಶ್ರವಣ ಸೇವೆಗೆ 20.39 ಕೋಟಿ ಹಾಗೂ 50 ಆಡಿಯಾಲಜಿಸ್ಟ್ ನೇಮಕಕ್ಕೂ ಅನುಮೋದನೆ ಸಿಕ್ಕಿದೆ. ಕಾಲೇಜು-ವಿಶ್ವವಿದ್ಯಾಲಯಗಳಲ್ಲಿ ವಿದ್ಯಾರ್ಥಿ ಸಂಘ ಚುನಾವಣೆಗೆ ಅನುಮತಿ ನೀಡಲಾಗಿದೆ.

 

ರೈತರು ಈಗ ಏನು ಮಾಡಬೇಕು.?

ನೇಗಿಲಯೋಗಿ ಯೋಜನೆ ಇನ್ನೂ ಪ್ರಾಯೋಗಿಕ ಹಂತದಲ್ಲಿದ್ದು, ಆಯ್ದ 31 ತಾಲೂಕುಗಳ ಪಟ್ಟಿ ಮತ್ತು ಅರ್ಜಿ ವಿಧಾನವನ್ನು ಕೃಷಿ ಇಲಾಖೆ ಶೀಘ್ರದಲ್ಲೇ ಪ್ರಕಟಿಸುವ ಸಾಧ್ಯತೆಯಿದೆ.

ಆಸಕ್ತ ರೈತರು ತಮ್ಮ ಜಮೀನಿನ ಪಹಣಿ, ಆಧಾರ್ ಮತ್ತು ಬ್ಯಾಂಕ್ ವಿವರ ಸಿದ್ಧಪಡಿಸಿಟ್ಟುಕೊಳ್ಳುವುದು ಒಳ್ಳೆಯದು. ಮಾಹಿತಿಗಾಗಿ ಸ್ಥಳೀಯ ರೈತ ಸಂಪರ್ಕ ಕೇಂದ್ರ, ಕೃಷಿ ಇಲಾಖೆ ಕಚೇರಿ ಅಥವಾ ಸೇವಾ ಸಿಂಧು ಪೋರ್ಟಲ್‌ಗೆ ಭೇಟಿ ನೀಡಬಹುದು.

ಸೇವಾ ಸಿಂಧು: https://sevasindhu.karnataka.gov.in/

ಕೃಷಿ ಇಲಾಖೆ: https://raitamitra.karnataka.gov.in/

ಸಣ್ಣ ರೈತನ ಜಮೀನು ಬೀಳು ಬೀಳದಂತೆ ನೋಡಿಕೊಳ್ಳುವುದು ಕೇವಲ ಯೋಜನೆಯ ಮಾತಲ್ಲ, ಆತನ ಮನೆಯಲ್ಲಿ ಆಹಾರ ಭದ್ರತೆಯ ಪ್ರಶ್ನೆ. ಸರ್ಕಾರ ಘೋಷಿಸಿದ ಯೋಜನೆ ನೆಲದ ಮೇಲೆ ನಿಜವಾಗಿ ಟ್ರ್ಯಾಕ್ಟರ್ ಓಡಿದಾಗ ಮಾತ್ರ ಈ ನಿರ್ಧಾರಕ್ಕೆ ಅರ್ಥ ಬರುತ್ತದೆ.

ಪ್ರಾಯೋಗಿಕ ತಾಲೂಕುಗಳಲ್ಲಿ ಮೊದಲ ಉಳುಮೆ ಯಾವಾಗ ಆರಂಭವಾಗುತ್ತದೆ ಎಂಬುದನ್ನು ರೈತರು ಎದುರು ನೋಡುತ್ತಿದ್ದಾರೆ.