BDA Site Allotment 2026: ಬಿಡಿಎ ಶಿವರಾಮ ಕಾರಂತ ಬಡಾವಣೆ – 2,815 ನಿವೇಶನಗಳಿಗೆ ಅರ್ಜಿ ಆಹ್ವಾನ

BDA Site Allotment 2026: ಬಿಡಿಎ ಶಿವರಾಮ ಕಾರಂತ ಬಡಾವಣೆ – ಸಾರ್ವಜನಿಕರಿಗೆ 2,815 ನಿವೇಶನ, ಅಕ್ಟೋಬರ್ 15ರೊಳಗೆ ಅರ್ಜಿ ಸಲ್ಲಿಸಿ

ಬೆಂಗಳೂರು: ದಶಕಗಳ ಕಾನೂನು ಹೋರಾಟ, ಭೂಸ್ವಾಧೀನ ವಿವಾದ ಮತ್ತು ನ್ಯಾಯಾಲಯದ ನಿರ್ದೇಶನಗಳ ನಂತರ, ಬೆಂಗಳೂರು ಅಭಿವೃದ್ಧಿ ಪ್ರಾಧಿಕಾರ (ಬಿಡಿಎ) ಡಾ. ಕೆ. ಶಿವರಾಮ ಕಾರಂತ ಬಡಾವಣೆಯಲ್ಲಿ ಸಾಮಾನ್ಯ ಸಾರ್ವಜನಿಕರಿಗಾಗಿ 2,815 ನಿವೇಶನಗಳಿಗೆ ಅಧಿಕೃತವಾಗಿ ಅರ್ಜಿ ಆಹ್ವಾನಿಸಿದೆ.

ಆಗಸ್ಟ್ 31, 2026ರಂದು ಹೊರಬಿದ್ದ ಅಧಿಸೂಚನೆ ಸಂಖ್ಯೆ BDA/Adm/Allotment/Secy/E-85532/2026-27 ರ ಪ್ರಕಾರ, ಆನ್‌ಲೈನ್ ಅರ್ಜಿ ಸಲ್ಲಿಕೆ ಅಕ್ಟೋಬರ್ 15, 2026 ಮಧ್ಯಾಹ್ನ 12 ಗಂಟೆಯವರೆಗೆ ಮುಂದುವರಿಯಲಿದೆ.

ಉತ್ತರ ಬೆಂಗಳೂರಿನ ಯಶವಂತಪುರ, ಹೆಸರಘಟ್ಟ ಮತ್ತು ಯಲಹಂಕ ಹೋಬಳಿಗಳ 17 ಹಳ್ಳಿಗಳಲ್ಲಿ ಹರಡಿರುವ ಈ ಬಡಾವಣೆ ಸುಮಾರು 3,069 ಎಕರೆ ವಿಸ್ತೀರ್ಣದಲ್ಲಿದೆ. ವಿಮಾನ ನಿಲ್ದಾಣದ ಹತ್ತಿರದ ಪ್ರದೇಶ, ಬೆಂಗಳೂರು ಬಿಸಿನೆಸ್ ಕಾರಿಡಾರ್ ಸಂಪರ್ಕದ ನಿರೀಕ್ಷೆ ಮತ್ತು ಯೋಜಿತ ಉದ್ಯಾನ, ಶಾಲೆ, ಕ್ರೀಡಾಂಗಣ, ವಾಣಿಜ್ಯ ಸ್ಥಳಗಳು ಇರುವುದರಿಂದ ಈ ನಿವೇಶನಗಳಿಗೆ ಬೇಡಿಕೆ ಹೆಚ್ಚಾಗುವುದು ಸಹಜ. ಮೊದಲ ದಿನವೇ ಸುಮಾರು 2,000 ಅರ್ಜಿಗಳು ಬಂದಿರುವುದು ಇದಕ್ಕೆ ಸಾಕ್ಷಿ.

 

ಯಾಕೆ ಈ ಬಡಾವಣೆ ವಿಶೇಷ?

2008ರಲ್ಲಿ ಪ್ರಾಥಮಿಕ ಅಧಿಸೂಚನೆ ಹೊರಬಿದ್ದಾಗಿನಿಂದ ರೈತರು ಮತ್ತು ಭೂಮಾಲೀಕರು ದೀರ್ಘ ಹೋರಾಟ ನಡೆಸಿದರು. ಸುಪ್ರೀಂ ಕೋರ್ಟ್ ನಿರ್ದೇಶನದಂತೆ ಭೂಮಿ ಒಪ್ಪಿಸಿದವರಿಗೆ 60:40 ಸೂತ್ರ ಮತ್ತು ಪ್ರೋತ್ಸಾಹಧನ ನಿವೇಶನಗಳಿಗೆ ಆದ್ಯತೆ ನೀಡಲಾಯಿತು.

ಆಗಸ್ಟ್ 31ರಂದು ಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್ ಅವರು ಭೂಮಾಲೀಕರಿಗೆ ನಿವೇಶನ ಪತ್ರಗಳನ್ನು ಹಸ್ತಾಂತರಿಸಿದ ನಂತರವೇ ಸಾರ್ವಜನಿಕ ಹಂತಕ್ಕೆ ಬಾಗಿಲು ತೆರೆಯಲಾಗಿದೆ. ಬಿಡಿಎ ಕೊನೆಯ ಬಾರಿ ಸಾರ್ವಜನಿಕರಿಗೆ ನಿವೇಶನ ಹಂಚಿಕೆ ಮಾಡಿದ್ದು 2016ರ ನಾಡಪ್ರಭು ಕೆಂಪೇಗೌಡ ಬಡಾವಣೆಯಲ್ಲಿ.

ಅದಕ್ಕೂ ಹಿಂದಿನ ಹತ್ತು ವರ್ಷಗಳಲ್ಲಿ ಬಹುತೇಕ ನಿವೇಶನಗಳು ಹರಾಜಿನ ಮೂಲಕವೇ ಹೋಗುತ್ತಿದ್ದವು. ಆದ್ದರಿಂದ ಈ ಅವಕಾಶವನ್ನು ಅನೇಕ ಮಧ್ಯಮ ವರ್ಗದ ಕುಟುಂಬಗಳು ಕಾಯುತ್ತಿದ್ದವು.

ಹೈಕೋರ್ಟ್ ಅರ್ಜಿ ಆಹ್ವಾನಕ್ಕೆ ಅನುಮತಿ ನೀಡಿದ್ದರೂ, ಅಂತಿಮ ಹಂಚಿಕೆ ಮುಂದಿನ ನ್ಯಾಯಾಲಯ ನಿರ್ದೇಶನಕ್ಕೆ ಒಳಪಟ್ಟಿದೆ ಎಂಬುದನ್ನು ಅರ್ಜಿದಾರರು ಮರೆಯಬಾರದು. ನಿವೇಶನ ಸಂಖ್ಯೆ ಬದಲಾಗುವ ಸಾಧ್ಯತೆಯನ್ನೂ ಬಿಡಿಎ ಮುಕ್ತವಾಗಿ ತಿಳಿಸಿದೆ.

 

ನಿವೇಶನ ಅಳತೆ, ದರ ಮತ್ತು ಠೇವಣಿ.?

ಪ್ರಸ್ತುತ ಹಂತದಲ್ಲಿ ಮೂರು ಅಳತೆಯ ನಿವೇಶನಗಳಿವೆ. ಎಲ್ಲಕ್ಕೂ ಏಕರೂಪದ ದರ ₹64,584 ಪ್ರತಿ ಚದರ ಮೀಟರ್. ಇದು ಸುಮಾರು ₹6,000 ಪ್ರತಿ ಚದರ ಅಡಿಗೆ ಸಮನಾಗುತ್ತದೆ.

9×12 ಮೀಟರ್ (ಸುಮಾರು 30×40 ಅಡಿ) ನಿವೇಶನ 2,500. ತಾತ್ಕಾಲಿಕ ಸೈಟಲ್ ಮೌಲ್ಯ ₹69,75,072. ನೋಂದಣಿ ಶುಲ್ಕ ₹2,000. ಆರಂಭಿಕ ಠೇವಣಿ ಪ.ಜಾ/ಪ.ಪಂ/ವರ್ಗ-1ಕ್ಕೆ ₹3,48,754, ಇತರರಿಗೆ ₹8,71,884.

12×18 ಮೀಟರ್ (ಸುಮಾರು 40×60 ಅಡಿ) ನಿವೇಶನ 300. ಮೌಲ್ಯ ₹1,39,50,144. ನೋಂದಣಿ ₹4,000. ಠೇವಣಿ ಕ್ರಮವಾಗಿ ₹6,97,507 ಮತ್ತು ₹17,43,768.

15×24 ಮೀಟರ್ (ಸುಮಾರು 50×80 ಅಡಿ) ನಿವೇಶನ ಕೇವಲ 15. ಮೌಲ್ಯ ₹2,32,50,240. ನೋಂದಣಿ ₹5,000. ಠೇವಣಿ ₹11,62,512 ಮತ್ತು ₹29,06,280.

ಅರ್ಜಿ ಶುಲ್ಕ ಪ.ಜಾ/ಪ.ಪಂ/ವರ್ಗ-1ಕ್ಕೆ ₹500, ಇತರರಿಗೆ ₹1,000. ಠೇವಣಿಗೆ ಬಡ್ಡಿ ಇಲ್ಲ. ಆಯ್ಕೆಯಾದವರಿಗೆ ಇದು ಒಟ್ಟು ಬೆಲೆಯಲ್ಲಿ ಹೊಂದಿಸಲಾಗುತ್ತದೆ, ಉಳಿದವರಿಗೆ ಆರ್‌ಟಿಜಿಎಸ್ ಮೂಲಕ ವಾಪಸು. ಅಂತಿಮ ದರ ಹಂಚಿಕೆ ಪತ್ರದ ವೇಳೆ ಪರಿಷ್ಕರಣೆಗೆ ಒಳಪಡಬಹುದು.

 

ಯಾರು ಅರ್ಜಿ ಹಾಕಬಹುದು.?

ಅರ್ಜಿ ಸಲ್ಲಿಸುವ ದಿನಕ್ಕೆ 18 ವರ್ಷ ಪೂರ್ಣವಾಗಿರಬೇಕು. ಕರ್ನಾಟಕದಲ್ಲಿ ಕನಿಷ್ಠ 15 ವರ್ಷ ನಿರಂತರ ವಾಸವಿರಬೇಕು. ಅರ್ಜಿದಾರರು ಅಥವಾ ಅವಲಂಬಿತ ಕುಟುಂಬ ಸದಸ್ಯರು ಬೆಂಗಳೂರು ಮಹಾನಗರ ಪ್ರದೇಶದಲ್ಲಿ ಬಿಡಿಎ, ಗೃಹ ಮಂಡಳಿ, ನಗರಾಭಿವೃದ್ಧಿ ಪ್ರಾಧಿಕಾರ ಅಥವಾ ಸಹಕಾರ ಸಂಘದಿಂದ ಈ ಹಿಂದೆ ನಿವೇಶನ/ಮನೆ ಪಡೆದಿದ್ದರೆ ಅರ್ಹರಲ್ಲ. ರಾಜ್ಯದ ಬೇರೆ ಯಾವುದೇ ನಗರಾಭಿವೃದ್ಧಿ ಸಂಸ್ಥೆಯಿಂದಲೂ ಪಡೆದಿದ್ದರೆ ಅನರ್ಹ.

ಕರ್ನಾಟಕ ಕೇಡರ್‌ನ ಅಖಿಲ ಭಾರತ ಸೇವಾ ಅಧಿಕಾರಿಗಳು ಮತ್ತು ಸೇವೆಯಲ್ಲಿರುವ ಯೋಧರಿಗೆ 2 ವರ್ಷದ ವಾಸಸ್ಥಳ ಸಾಕು. ವಿಕಲಚೇತನರಿಗೆ ನಿವೇಶನ ಮೌಲ್ಯದ ಮೇಲೆ 5 ಶೇಕಡಾ ರಿಯಾಯಿತಿ, ಗರಿಷ್ಠ ₹1 ಲಕ್ಷ.

ಮೀಸಲಾತಿ ನಿಯಮ 1984ರಂತೆ: ಪ.ಜಾ 15%, ಪ.ಪಂ 3%, ವರ್ಗ-1 2%, ಹಿಂದುಳಿದ ವರ್ಗ 10%, ಮಾಜಿ ಸೈನಿಕ/ಕುಟುಂಬ 5%, ರಾಜ್ಯ ಸರ್ಕಾರಿ ನೌಕರರು 8%, ಕೇಂದ್ರ ನೌಕರರು 2%, ವಿಕಲಚೇತನ 3%, ವಿಶೇಷ ಸಾಧಕರು 2%, ಸಾಮಾನ್ಯ 50%.

 

ಅರ್ಜಿ ಹೇಗೆ ಸಲ್ಲಿಸುವುದು.?

ಅಧಿಕೃತ ಅರ್ಜಿ ಲಿಂಕ್: https://bdakarnataka.in

ಮೊಬೈಲ್ ಮತ್ತು ಇಮೇಲ್‌ನಿಂದ ನೋಂದಣಿ ಮಾಡಿ, ವೈಯಕ್ತಿಕ ವಿವರ, ಆಧಾರ್, ವರ್ಗ, ನಿವೇಶನ ಅಳತೆ ಆಯ್ಕೆ ಮಾಡಿ. ಆಧಾರ್, ಪ್ಯಾನ್, 15 ವರ್ಷದ ವಾಸಸ್ಥಳ ಪುರಾವೆ (ಪಡಿತರ ಚೀಟಿ, ಮತದಾರರ ಗುರುತು, ಶಾಲಾ ದಾಖಲೆ), ವಯಸ್ಸಿನ ಪುರಾವೆ, ಭಾವಚಿತ್ರ, ಬ್ಯಾಂಕ್ ಪಾಸ್‌ಬುಕ್/ಚೆಕ್, ಮೀಸಲಾತಿ ಪ್ರಮಾಣಪತ್ರ, ಆಸ್ತಿ ಇಲ್ಲದ ಸ್ವಯಂ ಘೋಷಣೆ ಅಪ್‌ಲೋಡ್ ಮಾಡಿ. ನಂತರ ನೋಂದಣಿ ಶುಲ್ಕ ಮತ್ತು ಠೇವಣಿ ಪಾವತಿಸಿ ರಶೀದಿ ಉಳಿಸಿಕೊಳ್ಳಿ.

ಇಂಟರ್ನೆಟ್ ಸೌಲಭ್ಯವಿಲ್ಲದವರು ಬೆಂಗಳೂರು-ಒನ್, ಕರ್ನಾಟಕ-ಒನ್, ಗ್ರಾಮ-ಒನ್, ಬಿಡಿಎ ಕಚೇರಿ ಅಥವಾ ನಿಗದಿತ ಬ್ಯಾಂಕುಗಳಲ್ಲಿ (ಕೆನರಾ, ಎಸ್‌ಬಿಐ, ಆಕ್ಸಿಸ್, ಪಿಎನ್‌ಬಿ, ಎಚ್‌ಡಿಎಫ್‌ಸಿ, ಕರ್ನಾಟಕ ಬ್ಯಾಂಕ್, ಫೆಡರಲ್, ಕೋಟಕ್, ಬ್ಯಾಂಕ್ ಆಫ್ ಬರೋಡಾ, ಸೌತ್ ಇಂಡಿಯನ್ ಬ್ಯಾಂಕ್) ಸಹಾಯ ಪಡೆಯಬಹುದು.

ಕೊನೆಯ ದಿನ ಸರ್ವರ್ ಒತ್ತಡ ಹೆಚ್ಚಾಗುತ್ತದೆ. ಆದ್ದರಿಂದ ಇಂದೇ ದಾಖಲೆಗಳನ್ನು ಸಿದ್ಧಪಡಿಸಿ, ಅಧಿಸೂಚನೆಯನ್ನು ಪೂರ್ಣವಾಗಿ ಓದಿ, ಬ್ಯಾಂಕ್ ಖಾತೆ ವಿವರ ಸರಿಯಾಗಿ ನಮೂದಿಸಿ ಅರ್ಜಿ ಸಲ್ಲಿಸುವುದು ಜಾಣತನ. ತಪ್ಪು ಮಾಹಿತಿ ನೀಡಿದರೆ ಅರ್ಜಿ ರದ್ದಾಗುವ ಅಪಾಯವಿದೆ.

ಸ್ವಂತ ಮನೆಯ ಕನಸು ನೋಡುವವರಿಗೆ ಇದೊಂದು ಅಪರೂಪದ ಅವಕಾಶ; ಆದರೆ ನಿಯಮ, ದರ ಮತ್ತು ನ್ಯಾಯಾಲಯದ ನಿಬಂಧನೆಗಳನ್ನು ಅರಿತು ಮುಂದುವರಿಯುವುದು ಅಗತ್ಯ.

SSP Scholarship 2026-27 Deadline: SSP ವಿದ್ಯಾರ್ಥಿವೇತನ 2026-27